Basaundi auzoak ohiko San Inazio jaiak ospatuko ditu ostiral honetan, uztailak 31. Herritarrek oso maite zuten ospakizun batetik bueltan da hitzordua, azken edizioetan egin ezin izan zena, inguruan egindako hiri-berroneratze eta eraikinen birgaitze lan garrantzitsuen ondorioz.

Jai hauek berreskuratzea Lasarte-Oriako Udalak eta Itxaropen Auzoko Bizilagunen Elkarteak sinatutako lankidetza-hitzarmenaren parte da. Hitzarmen horri esker, besteak beste, Karmengo jaiak eta San Inaziokoak ospatu daitezke. Helburua auzoko bizitza soziala suspertzea da, eta bertako biztanleen artean sakon errotutako ospakizunak berreskuratzea.

Txus Alonso Ocariz Jaietako zinegotziak jaietako hitzordu horiek berreskuratzearen garrantzia azpimarratu du.

"Urte batzuetan obrek auzoko jarduera baldintzatu ondoren, ilusio berezia egiten zigun Basaundiri bere San Inazio jaiak itzuli ahal izateak. Itxaropen Auzoko Bizilagunen Elkartearekin izandako lankidetzari esker, gure jaietako bat berreskuratzea lortu dugu, gaur egun guztiz eraberrituta dagoen auzo batean.”

Programazioa 09:00etan hasiko da, Basaundi plazatik abiatuko den ibilaldi neurtuarekin, eta ondoren, Oria eta Basaundi auzoetan barrena, ohiko txistularien dianarekin jarraituko dute. Goizean zehar haur jolasak eta herri jolasak izango dira Buruntza-Azpik antolatuta, txarangak auzoan zehar egingo duen ibilbideaz gain.

14:00etan paella-jana izango da, eguneko ekitaldi jendetsuenetako bat. Arratsaldean, mus txapelketa, xake txapelketa Erlantz Sánchezekin, gaztelu puzgarriak, haurrentzako askaria eta zumba master class bat izango dira, parte hartu nahi duten guztientzat irekia.

Egunaren azken txanpan festa giroa nagusituko da, txistorrada herrikoia eta Arka Rock eta StereoRock taldeen musika emanaldiak eta Ibai Berriak taldearekin dantzaldia izango dira nagusi.

Udaletik Lasarte-Oriako herritar guztiak animatu nahi dituzte Basaundira hurbildu eta jaietan parte hartzera.