Lasarte-Oriako Udalak gaur, uztailak 14, amaitu du Oztarango ikastetxe zaharra husteko prozesua, jarduera baimentzen zuen aldeko ebazpen judiziala lortu ostean. Normaltasun osoz eta modu baketsuan egin da esku-hartzea.

Eraikinaren barruan zeuden pertsonak beren borondatez atera dira instalazioetatik. Gehienek atzo egin zuten, eta oraindik eraikinean zeuden lau pertsonek gaur goizean egin dute, indarrezko jardunik behar izan gabe.

Eraikina husteko antolaturiko dispositiboan Ertzaintzak eta Udaltzaingoak parte hartu dute, bai eta Udaleko Gizarte Zerbitzuetako teknikariek ere. Azken horiek bertan egon dira, hala eskatuz gero, Udalak hustutako pertsonei arreta eta gizarte-laguntzako baliabideak eskaintzeko.

Jarduera honekin, Udalak hasitako prozedura amaitzen da, egitura eta osasungarritasun arazoak dituen eraikin batean sortutako egoera dela eta. Egoera horren ondorioz, pertsonen segurtasuna bermatzeko beharrezkoak diren neurriak hartu ziren.

Udalak operazioaren garapenean parte hartu duten alde guztien laguntza eta jarrera eskertu nahi ditu, egoera istilurik gabe konpontzea ahalbidetu baitute.