Lasarte-Oriako Udaleko Kultura zinegotzi Ainara Elicecheak eta liburutegiko zerbitzuaren arduradun Irene Urruzolak prentsaurrean aurkeztu dute gaur goizean Lasarte-Oriako Udal Liburutegiak martxotik ekainera bitartean eskainiko duen kultura-programazioa. Proposamenak adin guztietarako jarduerak biltzen ditu: helduentzako solasaldi literarioetatik hasi eta haurrentzako ipuin-kontalari saioetara eta literatura, artea eta sare sozialak uztartzen dituen argazki-erakusketa bateraino.

Arduradunek azaldu dutenez, programazioaren helburua da liburutegia herritarren interes ezberdinetara egokitutako espazio ireki, dinamiko eta parte-hartzailea bilakatzea.

Aurkezpenean, Ainara Elicechea zinegotziak liburutegiaren rola azpimarratu du topagune kultural gisa:

“Liburutegia ez da bakarrik irakurtzeko edo ikasteko leku bat; topagune bat ere bada, aurkikuntzarako eta parte-hartzerako gunea. Programazio honekin herritarrei irakurzaletasuna eta hausnarketa kolektiboa sustatuko duten jarduera erakargarriak eskaini nahi dizkiegu. Belaunaldiak, kulturak eta mundua ikusteko modu ezberdinak gurutzatzen diren liburutegi ireki baten aldeko apustua egiten dugu.”

Proposatutako programazioa

Solasaldi literarioen zikloa: elkarrizketa, literatura eta komunitatea

Programazioaren ardatz nagusietako bat izango da solasaldi literarioen zikloa. Martxotik ekainera bitartean egingo dira saioak, hilabetean behin, 18:00etatik 20:00etara. Saioak estilo eta jatorri ezberdinetako novela laburren inguruan antolatuko dira, betiere kalitate literarioa eta hausnarketa kolektiboa sustatzeko gaitasuna kontuan hartuta.

• Martxoaren 24an ireki zen zikloa Yoko Ogawa idazle japoniarraren Irakaslearen formula kutuna lanarekin: memoria arazoak dituen matematikako irakasle bat, ama bat eta haren semea lotzen dituen istorio hunkigarria.
• Maiatzaren 5ean, Amélie Nothomb belgikarraren Estupor eta dardarak lanaren txanda izango da: enpresa japoniar handi batean izandako lan-esperientzia autobiografikoan oinarritua.
• Ekainaren 2an, Stefan Zweigen Xake-nobela klasiko ezaguna izango da hizpide; egoera muturrekoetan xakeak salbazio-bide bihur daitekeela erakusten duen lana.

Saioak Mónica Leiva irakurketa partekatuan aditua eta literatura-mediatzaileak dinamizatuko ditu, irakurketa-gakoak emanez eta parte-hartzaileen arteko elkarrizketa bultzatuz.

Lego Spike robotika tailerrak

Apirilaren 5ean, 6 urtetik gorako haurrei zuzendutako bi robotika hezigarriko tailer egingo dira liburutegian, Lego Spike erabiliz. Saio bakoitzean gehienez 20 parte-hartzaile egongo dira, eta Discover Bricks enpresak gidatuko ditu. Jardueraren helburua da pentsamendu logikoa, sormena eta talde-lana garatzea jolasa eta programazioa uztartuz.

Haurrentzako ipuin-kontalariak Haur eta Gazte Liburuaren Nazioarteko Egunean

Apirilaren 2an ospatzen den Haur eta Gazte Liburuaren Nazioarteko Eguna dela eta, Mamuak eta beste auzokide batzuk izeneko ipuin-kontalaria izango da liburutegian, 4 eta 10 urte bitarteko haurrentzat. Jarduera 18:00etan izango da eta helburua da txikitatik irakurzaletasuna sustatzea, jolasaren, ahozko narrazioaren eta irudimenaren bidez.

Horrez gain, apirilaren 11n “Liburu Baby Kluba”ren beste saio bat egingo da: 0 eta 3 urte bitarteko haurrentzat pentsatutako hileko ipuin-kontalaria, gurasoekin batera. Saioa euskaraz, gaztelaniaz eta ingelesez izango da, eta haurtxoak liburuen mundura hurbiltzea du helburu, estimulu sentsorialen eta lotura afektiboaren bitartez.

Hurrengo saioak: apirilaren 12an, maiatzaren 10ean eta 31n, eta ekainaren 7an eta 21ean izango dira, 11:00etan, euskaraz, gaztelaniaz eta ingelesez.

Bookface erakusketa: irudia, liburua eta sormena uztartzen dituen proposamena

Apirilaren 23an ospatzen den Liburuaren Nazioarteko Eguna dela eta, aurrez aurreko jarduerez gain, Bookface erakusketa ikusgai izango da aste hauetan liburutegian. Proiektu bisual berritzaile honek liburuen mundua argazkigintza eta sare sozialen artearekin lotzen du. "Bookface" teknikan pertsona baten aurpegia edo gorputzaren zati bat liburu baten azalean lerrokatzen da, irudi jarraitu eta harrigarri bat sortuz.

Erakusketan Zizurkilgo Plazida Otaño liburutegiko taldeak egindako irudien hautaketa bat aurkezten da. Argazkietan parte hartu dutenak benetako erabiltzaileak dira, eta helburua da liburutegiaren irudi isil eta itxia hautsi eta publiko gaztearengana modu sortzaile eta hurbilean iristea.

Liburutegiko arduradun Irene Urruzolak adierazi duenez, “Erakusketa hau ekarri nahi izan dugu, oso modu originala iruditzen zaigulako liburuak erdigunean jartzeko, publiko berriekin konektatzeko eta liburutegietan ere ustekabea eta espresio artistikoa badagoela erakusteko.”

Amaitzeko, Ainara Elicechea zinegotziak eskerrak eman dizkio liburutegiko taldeari egindako lanagatik, eta nabarmendu du kalitatezko eta inklusiboa den programazio baten aldeko konpromisoa dutela. Herritarrei dei egin die proposamenetan aktiboki parte hartzera.