Lasarte-Oriako Udalak, Kultura arloaren bitartez, 2025eko literatur lehiaketetan parte hartzeko epea ireki du: XXXIX. Literatur Lehiaketa eta Haur eta Gazteen XXXVIII. Bi sariketen helburua da udalerrian idatzizko sormena sustatzea eta adin guztietako pertsonentzako adierazpen-plataforma bat eskaintzea.

Ainara Elicechea Kultura zinegotziak lehiaketa hauen irekieraren berri eman du. Lehiaketa hauek, urtez urte, udalerriko kultur ekimen nagusienetarikoa bezala finkatzen dira. “Lehiaketa hauek ez dira soilik talentu berriak aurkitzeko plataforma bat, baizik eta euskararen eta literaturaren erabilera adierazpide gisa bultzatzen jarraitzeko tresna ere badira”.

Lanak aurkezteko epea maiatzaren 16an amaituko da eta posta elektronikoz egin beharko da entrega, oinarrietan jasotako argibideei jarraituz. Aurreko edizioetan bezala, lanek argitaragabeak eta originalak izan beharko dute, eta izengoiti aurkeztu beharko dira, datu pertsonalak dituen fitxa artxibo bereizian erantsiz. Epaimahaiaren erabakia urrian jakinaraziko dute eta sari banaketa azaroaren 22an izango da.

XXXIX. Literatur Lehiaketa 2009an edo lehenago jaiotako pertsonei irekita dago, euskarazko zein gaztelaniazko lanak aurkezteko. Bi espezialitate eskainiko dira: Poesia eta Mikrokontakizuna, 650 euroko sariekin eta diploma kategoria bakoitzeko. Horrez gain, “Lasarte-Oria” sari bereziak emango zaizkie herrian erroldatuta dauden 16 eta 26 urte bitarteko gazteei.

Bestalde, Haur eta Gazteen XXXVIII. Lehiaketa 2010 eta 2016 urteen artean jaiotako ikasleei zuzenduta dago, jaiotze urtearen arabera hiru kategoriatan antolatuta. Sarituko diren espezialitateak ipuina eta poesia dira, euskaraz, eta kategoria bakoitzeko 200, 150 eta 100 euroko sariak jasoko dira, diploma egiaztatzaileaz gain. Aurkeztutako testuen sormena, kalitate literarioa eta hizkuntza menderatzea baloratuko ditu epaimahaiak.

Elicecheak sariketa hauen balio hezitzailea azpimarratu nahi izan du: “Lasarte-Oriako haur eta gazteak herriko bizitza kulturalaren protagonista sentitzea nahi dugu. Idaztea askatasun-ekintza bat da, irudimen-ekintza bat, baita nortasun-ekintza bat ere. Horregatik, ikastetxe eta familia guztiak deialdi honetan inplikatzera animatzen ditugu”.

Dagoeneko ia lau hamarkada betetzen dituzten ekimen horien ibilbidea ere balioan jarri du zinegotziak: “Literatur lehiaketa bat hainbeste urtetan bizirik mantentzeak erakusten du Lasarte-Oria kultur kezka duen herria dela, idazteko, kontatzeko eta partekatzeko gogoa duena. Harro gaude idatzizko hitzaren bidez adierazi nahi dutenei espazio hau eskaintzen jarraitu ahal izateaz”.

Saritutako lanak Udalaren web orrian argitaratu ahal izango dira eta Udalaren literatur artxiboan sartuko dira. Oinarri osoak eta izena emateko fitxak eskuragarri daude atari horretan deskargatzeko, euskaraz zein gaztelaniaz.