Lasarte-Oriako alkate Agustin Valdiviak eta Artelatz enpresako ordezkari Ane Felipek 2025eko Aste Berderako diseinatutako jardueren programa aurkeztu dute gaur prentsaurrekoan; ekainaren 9tik 14ra izango da, “Birziklatzearen erronka” lelopean.

Ekimena Ingurumenaren Munduko Egunean kokatzen da, eta ekainaren 5ean ospatzen da Nazio Batuen ekimenez. Helburua herritarrak ekonomia zirkularraren eredu baterantz aurrera egiteko beharraz sentsibilizatzea da, kontsumo-ohitura arduratsuak eta hondakinak behar bezala bereiztea sustatuz.

Aurkezpenean, alkateak azpimarratu du “Lasarte-Oriako hondakinen gaikako bilketa nabarmen hobetu dela azken urteetan, 2022an % 44,9 izatetik 2025ean % 53,6 izatera igaro baita, nahiz eta oraindik urrun gauden Europako araudiak ezarritako helburutik, urte honetarako % 55 eta 2030erako % 60 ezartzen baitu”.

Ane Felipek, Artelatz ordezkatuz, programan aurreikusitako ekintzen multzoa azaldu du; horren muin nagusia herriko hainbat plazatan jarriko diren sei informazio guneak dira. Horietan, zalantzak argitzeaz gain, edukiontzi marroietan bildutako hondakin organikoekin egindako konposta banatuko dute doan.

Informazio-puntuen egutegia honako hau izango da:

• Ekainak 9: Basaundi (zirkuitu ibilbidea), 16:30etik 19:30era
• Ekainak 10: Elizatxe plazan, 16:30etatik 19:30etara
• Ekainak 11: Andatza plazan, 9:30etatik 13:30etara
• Ekainak 12: Elizatxe plazan, 16:30etatik 19:30etara
• Ekainak 13: Okendo plazan, 16:30etatik 19:30etara
• Ekainak 14: Elizatxe plazan, 9:30etatik 13:30etara

Horrez gain, saio didaktikoak eta hitzaldi-solasaldiak antolatuko dira helduen taldeekin, euskaltegiekin eta helduen hezkuntza zentroarekin, hondakinen kudeaketan sakontzeko, bereziki edukiontzi horiari eta ontziek jasotzen duten ondorengo tratamenduari dagokienez.

Udalak eskerrak eman nahi izan dizkie egunero hondakinak behar bezala bereizten dituztenei, eta herritar guztiei gogorarazi die birziklatzea ez dela aukera bat, ardura kolektibo bat baizik. Era berean, bilketa zerbitzua hobetzen jarraitzeko konpromisoa berretsi du, errefusaren edukiontzi grisak berritzea eta edukiontzi marroi berriak jartzea barne.

2025eko Aste Berdea aukera berri bat da Lasarte-Oria garbiago, arduratsuago eta ingurumenarekin konprometituago baterantz aurrera egiteko.