Lasarte-Oriako alkateak, Agustín Valdiviak, prentsaurrekoan azaldu zuen ekitaldi honek herriarentzat duen ilusioa: "Lehen aldiz Lasarte-Orian gertatzea ilusio handia egiten digu. Jatorri nafarrak ditugunok txikitatik daramagun zerbait da, eta pertsonalki asko poztu nau gure herrian ospatuko dela ikusteak. Oraingo honetan bost udalerri etorriko dira, eta hau hasiera besterik ez da. Urte gutxitan, Iruñekoa edo Tuterakoa baino handiagoa izango da hemen ospatzen den Erraldoi topaketa."

LOZET konpartsak hiru konpartsa gipuzkoar gonbidatu ditu: Andoaingo Levitón, Villabonako Besamotxa eta Donostiako Antiguoko Loretope; baita bi nafar konpartsa ere: Falces eta Kaparroso. LOZETeko ordezkariak azaldu zuenez, eguna 10:30ean hasiko da, konpartsa guztientzako topaketa eta gosariarekin: "Batez ere indarrak hartzeko izango da, gero ordu batzuk izango baitituzte aurretik."

11:00etan herri osoan zeharreko ibilaldia hasiko da eta Okendo plazan bukatuko da, 14:00ak inguruan. Bertan agur-argazkia aterako da, eta konpartsa guztiek elkarrekin dantza egingo dute aurkezpen-ekitaldi batean. "Bi dantza egingo dira elkarrekin, eta konpartsen aurkezpena izango da. Hau da, konpartsa bakoitza izendatuko da, agertu eta agurtuko da." azaldu zuten LOZETetik.

Desfilearen ondoren, parte-hartzaileek frontoian bazkaltzeko aukera izango dute. Txartelak salgai daude Artizar Tabernan, 15 euroko prezioan. Menuak ondokoa izango du: hasierakoak, paella, postrea, edaria, ogia eta barrikotea. "Herriko saltoki guztiei, gurekin elkarlanean aritu diren elkarteei, boluntario guztiei eta udalari eskerrak eman nahi dizkiegu," adierazi zuten LOZETetik.

Jaietako zinegotziak, Txus Alonsok, udalaren babesa azpimarratu zuen ekitaldi honetarako: "LOZETekin urteak daramatzagu, eta egiten duguna haiekin lankidetza-hitzarmen bat sinatzea da. Aurten, 5.795 euroko diru-laguntza dute, ez bakarrik Erreldoi topaketarako, baita San Pedroko jaien parte ere, non erraldoiak, buruhandiak eta suzko zezenak irteten diren. Eskerrak eman nahi dizkiogu LOZET konpartsari, bere ahaleginei eta proposamenei esker gure herriko kultura eta jai eskaintza dinamizatzen dutelako."

Eguna 20:30ean amaituko da, zezen suzko tradizionalarekin, eta bertaratuentzat ahaztezina izango den jardunaldiari amaiera emango zaio. "Topaketa ikusgarria izango da," adierazi zuten bertaratuek.