Lasarte-Oriako Udalak Eusko Jaurlaritzako Osasun Sailak eta Osakidetzak tabakoaren kontsumoa uztea sustatzeko abian jarritako kanpaina berria hedatzen lagunduko du, batez ere emakume helduen artean, kolektibo horretan uzte-tasak txikiagoak baitira oraindik gizonen artean baino.

Kanpainak gaur egun tabakismoa emakumeen osasunean izaten ari den ondorioetan jartzen du arreta, erretzeko ohituran gizonen kasuan baino beranduago sartu ondoren. Osasun Sailak bildutako datuen arabera, azken hogei urteetan tabakoari egotz dakiokeen hilkortasuna %98 igo da emakumeen artean, eta gizonen artean, berriz, %29 jaitsi da.

Eusko Jaurlaritzak, gainera, azpimarratu du erretzeko eta ez erretzeko arrazoiak ez direla berdinak gizonen eta emakumeen artean. Kanpainak, hain zuzen ere, desberdintasun horiek ikusarazi nahi ditu, eta erretzeari uztea posible dela dioen mezua indartu, Osakidetzak pertsona bakoitzari egokitutako baliabideak eta akonpainamendu programa espezifikoak dituela gogoraraziz.

Udalak kanpainaren materialak zabalduko ditu hainbat udal-espaziotan eta bere ohiko komunikazio-kanalen bidez, informazio hori herritarrei hurbiltzen laguntzeko. Besteak beste, kultur etxeetan, kirol instalazioetan, espazio publikoetan eta sare sozialetan mezu informatiboak agertzea aurreikusten du ekimenak.

Erretzeari uzteko laguntza jaso nahi dutenek informazio gehiago jaso dezakete beren osasun-zentroan edo Osasun Eskolaren webgunean (https://osasuneskola.osakidetza.eus).