Giza harremanak dira Dantzaz Sormen Koreografikorako Nazioarteko Zentroaren lan berriaren protagonistak. “Growing young” du izenburu. Itzik Galili, Janis Claxton, Daniele Ninarello eta Wubkje Kuindersma dira koreografoak, eta Dantzazen espirituari eta arimari omenaldi bat egin diote: etengabe hazten ari den eta gaztetasunaren energia, jakin-mina, xalotasuna eta jarioa mantentzen duen taldea da, etengabeko aldaketan dagoena, baina nortasun finkoarekin. Dantzazen ikuskizun berria nazioarteko gune handietatik (Korzo, Dancebase edota Piamonte dal Vivo) koreografo nabarmenek sortutako piezekin osatu da.